tabulas.com

Ang Sundo
(Kay Mariannette)
Ni Francis A. Montesena, 11/13/07


Gaano ang layo mo sa bahay na ito
at malaya mong nahawakan
ang pasimano ng kaniyang kahinaan?
Dama na niya ang iyong hininga
habang ikaw ay nasa likuran;
Kagaya ng nadarama
ng isang kawal na sugatan.
Maaari, wala kang pinipili.
Walang edad na pumipigil
sa pagkitil ng damdaming nasisikil.
Hindi siguro malaking kaabalahan
na iyong pangunahan ang kaniyang isipan
at naisingit mo ang pagsundo sa kaniya
sa mahabang listahan ng iyong mga ginagawa:
paggambala sa himbing na pagtulog,
pagsasabog ng sakit na tila halamang
itinatanim sa kung saan,
paghatak sa disgrasya
na tila paglilibang lamang.
Kahanga-hanga kang nasusupil
maging ang bago pa lamang
nahihinog na hilahil,
o ang papausbong pa lamang
na pagkaumay sa buhay.

Kanina lamang ay tiyak kong ikaw ang bumaba
mula sa isang itim na sasakyan patungo sa kanila.
Sinundan kita sa pag-aakalang
ako ang pakay mo at ikaw
ang matagal ko nang hinihintay na bisita.
Nang lumampas ka sa aking bahay,
inisip kong naligaw ka lamang,
nagkamali ka lamang nang pupuntahan
kaya humiyaw ako sa iyo at nagtanong
kung tukoy mo ang iyong dadalawin.
Lumingon ka lamang at tumango na may ngiti
hanggang tuluyang maglaho sa daanang liko.

Parasito
Ni Francisco A. Montesena, 11/21/07



Mabuhay ka para sa kalayaan,
Ito ang silbi mo sa bayan.
Mamatay ka para sa bayan,
Ito ang daan sa kalayaan.
Pero para sa isang Neneng
na nais lumayas
para kumalas
sa lahat ng di matanggap,
ang katumbas
ng labindalawang taon
ng kaniyang buhay
ay labindalawang dosena
o higit pa sa mga parasitong
naninimbang
sa kaniyang mga buhok;
At nagpapanaknak
sa kaniyang anit
sa mahigpit nilang
pagkakakapit.

Sumisigaw ka
ng pagbuhay
sa demokrasya,
paglaban sa paniniil,
pero sana, sa maliliit na sutil
maibulong mo man lamang,
Mabuhay kayo
na mga nabubuhay
sa kaniyang ulo.
Para magkaroon
si Neneng ng dahilan
na magbalik sa hinahon
at patuloy na maghanap
sa kinagiliwang
suyod.

1. Patapos na ang taon at humahabol pa ang mga blessings: unexpected na ang txt na narecieve ko from UP icw para ma-process na ang honorarium sa lalabas na UP likhaan journal, Sa Dec 8 ang launching nito.

Ang taong ito ay napakapositibo at mabunga para sa kin at salamat sa mga naging inspirasyon ko, humikayat naging kasama ko sa pagsusulat. Salamat na rin sa mga naging kaaway, sa mga hindi nakasundo ng pananaw.

2. Tapos na rin ang bahay ko at konting gastos na lang sa mga naiwan pang gagawin.

3. Nag-eenjoy akong basahin ngayon ang chapbook na Agaw-Liwanag ni Bomen Guillermo ng High Chair Series.

4. May malaking problema sa office na tinututukan ko ngayon dalawang linggo na kaya di ko napagbigyan ang ilang imbitasyon na magperform. Pasensya na po talaga sa inyong lahat.

Bayani at Berdugo
ni Francisco A. Montesena, 11/23/07

Nearly two decades after being sentenced with finality to double life imprisonment for the 1983 assassination of Benigno “Ninoy” Aquino Jr., a former aviation security officer walked out of maximum security prison yesterday after being pardoned by President Arroyo.
Philippine Star headline, 11/23/07

1

Ang sabi, ang mga balang naglagos
sa katawan ng bayani
ay galing sa kanilang mga kamay.
Ngunit walang makapagsabi
kung bakit may punglo
sa kanilang mga puso.


Nakadapa ang bayaning bumagsak sa lupa
waring humahalik ng pamamaalam.
At sa mga berdugong pumutol
sa kaniyang hininga,
nadugtungan kaya ng bala
ang sa kanila?

2.

Daigdig ang nililisan
ng mga bayani
ngunit may mga sulat
sa kanilang dibdib
na kailangan
na maiwan, maihatid,
mabasa, maitawid.

May mga pilit binubura
ang mga berdugo
ngunit lalagi,
may naiiwan
na kasaysayan.




3.

Sa bayani:

Maaari,
narito ka pa sana,
kung mabilis-bilis ka
lamang lumingon
at naiwasan ang mga bala;
o kung nahagip man,
nakita mo nang malinaw
ang pinaggalingan.

Sa mga berdugo:

Kuwag kang pakatitiyak
na may saradong mga mata.
Huwag kang pabulag
sa nakitang liwanag
sa garantiya ng iba,
at huwag na huwag
kang mananahan
sa walang –katiyakan.