tabulas.com

from my friend, published sa Sunday Inquirer

Postpartum by Sonny Corpuz Sendon

Inilatag ang kaniyang katawan
Sa putim-puting tela.
Sinukat ang sirkumperensiya ng ulo
At katawan, ang tangkad at timbang.

Nilanggas ang mga bahid ng dugo ng ina.
Nang putulin ang kaniyang pusod,
Tanda na rin iyon sa pagsuway-
Ang pusod ay hindi sa pusod ng ina
Nakadugtong. Sa puso.
Sa sugat nasukat ang tanda ng mundo.

Kung papaano humantong sa ganoong proseso
Ang lahat ng bagong-tao.

At sa pagkakataong yaon, mistulang
Ang daigdig ang lumiit sa kagampan

Ng himala, na dito lahat nagmumula
Ang lahat ng hindi nawawari,

Tayo, bago pa man maging ang sarili.

Kapwa Bughaw
Ni Francisco Arias Monteseña 7/4/06


May dahilan kang magtanong
kung bakit iisa ang kulay

ng langit at lungkot.
Kung bakit sa langit,

piling-pili ang nakapapasok,
sa lungkot ay marami ang nasisinok.

Madalas ay di makapiglas ang lahat
sa sigwa ng himutok, kumukurot

sa langit-langitang sulok,
hanggang ang buong paligid

ay lambungan ng alikabok.
Marahil, ang dahilan ng lungkot

sa kaniyang pagkabughaw
ay pagkauhaw sa di na mapukaw

na pag-uulayaw ng ngiti ng daigdig
at gaslaw ng maningning na araw.

Ang dahilan naman ng langit
ay upang makasungkit ng tanaw

at pagtingala mula sa baba
pataas sa naghinintay na Bathala.

Kung kapwa bughaw man
ang langit at lungkot,

diyan lang nagtatanaw,
diyan lang nag-uugnay,

sa kulay at tanging kulay lamang.
Kung anuman marahil ang dahilan

ng iyong pagtatanong , sana ay manatiling
sa bughaw na langit ka lamang

maniningala ng sagot at hinding-hindi
sa piling ng libong lungkot.

Enemy of the state


GMA is out jogging one morning when she trips and falls over a bridge railing, down to a creek below. Before the Presidential Security Group gets to her, three kids, who are fishing, pull her out of the water. She is so grateful she offers the kids whatever they want. The first kid says, “I want to go to Disneyland.” GMA says, “No problem, I’ll take you there.” The second kid says, “I want a new pair of Nike Air Jordan.” GMA says, “I’ll get them for you and even have Michael sign them!” The third kid says, “I want a motorized wheelchair with a built-in TV and stereo headset!” GMA is a little perplexed by this and says, “But you don’t look like you are handicapped.” The kid says, “I will be after my dad finds out I saved your ass from drowning!”
Larry, by email More Bar Room Jokes
-select- She's Cuckoo Action-Packed Wedding Night Baked Beans Stiff logic Hot for teacher Which is the better ride? Unzip, zap, zowee! It’s such a baby! No banks in hell God—busted! Enemy of the state

EKSENA SA JEEPNEY...

Case # 1 "Aray, ano ba?"
Madalas na dialogue ng mga babaeng feeling commercial model ng shampoo kung ipatangay sa hangin ang buhok. Mga walang pakialam kahit na ang mga katabi nila ay hirap na hirap na sa pag-iwas sa paghampas nito sa mukha nila. Kaya ako kapag di na ako makapagpigil, hinihila ko na yung buhok, sabay sorry kunwari akala ko buhok ko yun. At kapag sinusumpong ako, kinakalabit ko na at sinasabihan kong hindi ako kumakain ng buhok.

Case # 2 "Blah, blah, blah...'
Mga taong feeling sila lang ang sakay na kung mag-usap ay dinig ng lahat ng pasahero. Nakakaaliw sila minsan lalo na't mahaba ang byahe at walang radyo yung jeep. Pampalipas oras din sila, minsan nga gusto ko ng sumabat dun sa kwentuhan nila lalo na kapag nakaka-relate ako. Pero kapag inaantok ako at di na makapagpigil tinitignan ko sila na parang gusto kong dukutin ang lalamunan nila.

Case # 3: "Pakiabot lang po..."
Kapag napaupo ka ng medyo malapit-lapit sa driver, asahan mong magiging taga-abot ka ng bayad. Ok lang sana yun eh, hwag ka lang makaka-tyempo ng driver na may pagka-manyakis na nanadyang manghaplos ng kamay. O kaya naman ng driver na parang di pa ata nakakaalam na uso na ang deodorant. O kaya naman ng driver na mas malakas pang bumuga sa tambutso nya ang bunganga. Syempre wala naman akong magawa kundi ang magtakip na lang ng ilong at umurong agad kapag medyo lumuwang. At meron namang mga pasaherong sobrang bait na hindi ka pa nakakapagsalita ay kinukuha na sa kamay mo ang bayad mo. Meron din syempreng matatapang na kapag hindi mo nakuha agad yung bayad nila ay medyo itataas ang boses at may kasama pang ismid. Hay naku, pede ba wala akong kumisyon sa pag-abot ng bayad nyo ha.

Case # 4: "Makikiusog nga..."
Para sa mga kung umupo ay kala mo pang-dalawang tao ang binayaran. May mga babaeng kung umupo ay nakalihis, walang pakialam na yung katabi nya kalahating pwet na lang ang nakaupo. Meron din mga lalaking kung makaupo ay halos mangingimi kang tumingin sa kanya dahil sa laki ng pagkakabukaka. Animo'y may kung anong pinoprotektahan sa pagitan ng kanyang mga hita. Kapag ipit na ipit na ako, sinasabayan ko ang pag-preno ng mama sa pag-usog.

Pasensyahan na lang kung mapalakas.

Case # 5: "Ooozzz..."
Wala namang masama kung matulog ka habang nasa byahe, pero sana iang walang dantayan at basagan ng bao o di kaya ay matuluan ng panis nyang laway. Kapag may katabi akong natutulog na, hinahayaan ko lang (syempre alangan namang pigilan ko) at kapag babagsak na ung ulo nya sa 'kin, bigla kong ibinababa balikat ko para magulantang sya. Pero kapag cute ibang usapan na yan. Itinataas ko pa balikat ko para makahilig at ng makatulog sya ng maayos at ok lang na magka-untugan kami, malay mo magpakilala pa sya, asa pa.

Case # 6: "Mama, para ho..."
May mga driver na di mo mapipigilang mapamura sa sobrang tagal bago huminto na halos kailanganin mo ng sumakay pabalik sa layo ng pinagbabaan sa 'yo. Meron namang hihinto kahit na sa gitna ng kalsada mabawasan lang agad ang sakay nya. At meron ding halos mahalikan mo na yung katabi o kung minalas-malas ka ay mahuhulog ka pa dahil sa biglang pagpreno nya. May mga pasahero namang hindi pa nakuntento sa pagkalakas-lakas na pagsabi ng para at kumakatok pa sa bubong. Merong namang magbabayad kapag pababa na at may gana pang magalit kapag hindi agad naihinto ang sasakyan. At syempre merong mga nagmamadaling akala mo ay mauubusan ng lupa kung bumaba, kasehodang mabunggo at matapakan nyang lahat ng daraanan nya. Pero pamatay pa ring yung minsang may nakasakay akong mama na pagkalakas-lakas at paulit-ulit na sumisigaw ng "Bayad ho, bayad ho, bayad ho..." Syempre yung driver, kuntodo extend ng kamay nya. Nakatingin na lahat dun sa mama na kumakatok-katok pa sa bubong ng jeep. Sabay naalala nyang "Para" pala ang dapat nyang isinisigaw. Nyahaha...tawa ko ng tawa pagkababa nung mama!

At meron pa minsan na siguro kakapamili lang at kagagaling lang sa tawaran porsyon sa tiangge, imbes na "Mama, bayad oh!" ang nasabi ba naman ay " Mama, Pagbilan ho!" ay naku di ko alam kung tatawa ba ako ng malakas o hindi at baka ma offend ko cia! har har har

At may isa pah! Dahil sa sobrang pakikipagkwentuhan sa katabi, simula na ata ng sumakay siya eh dakdak na ng dakdak imbes na "Para" ang sabihin eh "BABAY!!" siguro ang nasa isip ng mahadera eh magbabay sa kasama niya pero sa driver niya nasabi! har har har! Kasi naman super daldakina!!!

Case # 7: "Love birds..."
Syempre pa, hindi mawawala ang mga mag-syotang kala mo may sariling mundo na kung maglampungan ay parang mga pusang di mapakali. Libreng sine 'to, rated 18, kaya lang nakakabitin din lalo na kapag nauna kang bumaba sa kanila. Meron tuloy mga lalaking 'nag-iinit' at biglang bibitaw ang kamay sa pagkakahawak sa bakal para kunwari mapapasubsob sa katabi nila o kaya naman bigla mong mararamdaman na yung siko nila nasa tagiliran mo na. Sarap sampalin ng mga ganung lalaki. Di naman sa nakikialam ako, pero wala namang inggitan...

Case # 8: "Estudyante blues..."
Maraming estudyante na nagbabasa ng libro sa loob ng jeep habang nasa biyahe. yung iba sa sobrang ganda ng binabasa ay nadadala sa kwento...'Yung nakasakay ko minsan na dalagita ay taimtim na nagbabasa ng "Noli Me Tangere". Hindi nya napansin na malapit na syang pumara at sa gulat na bababa na pala siya ay mahinhing sinabi sa driver "Paalam". Naku, tawa kami ng tawa sa kanya, pati nga sya ay natawa rin sa sinabi nya.

Laguna Lagoon
Ni Francisco A. Monteseña 7/5/06




Hindi na pamilyar
ang mga daan pauwi. Sawi

ang matang hinahanap
ang mga ilog. Durog

na ang mga bakas. Wakas
ng pinaglunuyang look, pook

ng aking kabataan. Lagot na ang pusod
na nagdurugtong sa Inang lalawigan

at sa aking kabuuan. Ang lahat
ay salamisim na di na masalamin.

Nagbabalik akong walang lawang
sumalubong, sumbong ng hangin

sa di na kilalang panauhin: “Wasak na
ang batuhang iyong tinatalon.

Taluntunin mo man sa iyong pagbabalik
ang nasa isip na daan, ililigaw ka na ng nakaraan!”

Ayokong pumayag na naglaho na
ang mga look, siguro’y nasa tagong sulok

ng nagtatampong bayang di kinawilihang
pasyalan ng naghahanap na anak-anakan.

Kagabi July 5, nainvite ako ni Bebang to do some poetry reading sa Market Market. Binasa ko ang tula ni Sir Fidel Rillo na SAg-od at ilang likha kong tula. OK naman ang experience. Sa trade Hall ito ginanap.


Nagdi - DVD marathon ako, last week Korean horror movies, ngayong week naman ay Thailand movies. nag-eenjoy akong panoorin ang mga ito. napanood ko na rin sa pirated dvd ang Click ni Adam Sandler at Nacho Libre ni Jack Black. nag-enjoy din ako pareho sa movies na ito.

Ang Pulitiko
Ni Francis Monteseña, 7/6/06


Noong mura pa ang aking edad,
madalas na tanong sa akin
ay kung ano ako “magiging” paglaki.
Mabilis kong pakli
“ako ay magiging pari!”
Matagal nang inihulma
ng pagiging relihiyoso ng pamilya
ang aking utak sa kung ano
ang nais kong mangyari.
Mahigpit kong itinakda ang sukat ng bukas:
di lamang magiging parisukat
ang relasyon ko sa Diyos.
Hindi magiging sarado sa apat na sulok
ang aking magiging pagsisilbi.
Hindi matatapos sa pagmimisa, pagbabasbas,
pagkakasal, pagbibinyag at pangangaral
ang aking misyong banal.

Iginupo ang aking mithi sa ibig ni Ama
na ako ay maging pulitiko. Iginuho niya lahat
sa pagsusugal sa akin sa landas
na inibig niya’t di naging kaniya.
Kahit pa anong tanggi at pakiusap,
sino akong sisira sa kaniyang pangarap.
Aniya, “ang pagpupulitiko ay walang ipinagkaiba
sa pamimintuho kaya’t walang kahirap-hirap ito.”
Nakalimutan niyang wala akong alam
sa panliligaw, matagal na akong
nagpakasal sa Diyos kahit inulila
ng kaniyang bendisyon.

Sa kalaunan, natutuhan ko na rin
ang mga ritwal sa pulitika.
Kung pagtataksil man sa Diyos
ang nagawa, di ko na inalintana.
Naging magandang kalaguyo
ang paglalaro ng tiwala ng iba
at masarap na karanasan
ang pakikipagtalik sa kapangyarihan.

Sa mga oras na ako ay naliligaw
sa ilang bahay-pari, naiisip kong
wala na rin namang dapat ipanghinayang
sa natamong kapalaran. Maging
sa loob ng simbahan, samut-saring kulay na rin
ng pulitika ang napakikinggan.

Binabalak kong mag-release ng chapbook. I came to this decision nang magka-virus attack ang PC ko at muntik nang mabura lahat ng poems ko.

Humihingi na ako ng mga quotations sa iba't ibang imprenta. Sana mag-push through. Ang mahal palang magpa-imprenta. Tapos kung ibebenta naman baka alang bumili kapag may mark-up pa.

Naka ready na sa doc. files ang pinili kong 40 poems at nangangalap na lang ako ng magbibigay ng mga salita sa chapbook para maisama ko sa pagpapaprint.

Open po sa mga friends ko na nais magbahagi ng salita. Request nyo lang at ipoforward ko sa inyo ang manuscript.

1. Planning stage pa lamang ng chapbook ang hirap na pala, yung inaasahan mong tutulong di pala maaasahan at yung di mo akalaing tutulong dumarating, salamat sa inyo. Sa paghahanap pa lamang ng murang printing press ang hirap din hayyyyyyyy.

2. Medyo nagtampo ako sa PP at nakapagpalitan kami ng text ni Xam na medyo off. But in the end nagkapaliwanagan na rin. pero andun pa rin ang tampo ko.

3. Nagsubmit ako ng entry s Ateneo workshop thru courier LBC, sana makarating. Kasi yung sa LIRA kung hindi ko pa tinawagan noon, ay di ko malalaman na pasok ako, sa LBC ko rin kasi pinadaan ang entry ko.

4. sumama daw ang loob ni Rio Alma dahil alang dumating na members ng LIRA noong Sunday workshop sa UP, eh nagpapalit ako ng schedule kay Nanoy at sabi niya ayos daw naman. Tapos nakareceive ako ng text na masama loob ni Rio Alma, kanino? sa akin? dapat dun sa coordinators ng schedule! hmmmppppppp.

5. Nakaschedule kong panoorin ang " The Break-up" 2nayt sa dvd, Jennifer Aniston and Vince Vaughn.

Hindi ako nakapasok kahapon dahil sa bagyo, at ang siste, pinasok pa ng tubig ang bahay ko at naglimas kami ng nanay ko maghapon. Basang-basa ang mga gamit ko. Kawawa naman nanay ko na nagpunas ng sahig habang ako namay hinhadlangan ko ang tubig sa kanal.

Ang aga ko pa namang gumising pero ala din akong nasakyan dahil sa ulan. Hindi na lang ako pumasok.

At pagdating ko ng office hayyyy may rush namang dapat gawin.

Sa Pook Na Ito
Ni Francis Monteseña 7/13/06


Sa pook na ito’y paliit nang paliit
ang sakop ng tanaw. Tunaw

ang landas ng agam-agam.
Sa gunam-gunam ay laro lamang

ang minsang pagdaiti
ng ating kapalaran.

Wala ka na sa pook na ito,
di ko na nadatnan.Di ka na

nakapaghintay sa sumpang tipanan.
Nagsawa na sa pamumulaklak

ng halakhak ang mga lambak
na pinadaus-usan ng ating kamusmusan.

Nakitil sa hilahil ang kaparangan
ng ating pangarap. Hanggang

ang pook na ito’y maging bilangguan
ng mga alaala. Kapos sa luwag

sa pagsisiksikan ng di mabilang
na pangakong sana ay magtatapos

sa aking pagbabalik at sa iyong
paghihintay. Ay! nakapanghihinayang.

1. Umattend ako sa palihan ng LIRA kahapon at nakakatuwang may mga nagustuhan naman akong tula ng fellows ngayon.

2. Sana pumayag naman yung inaasahan kong mageedit ng selection ko ng mga tula sa chapbook. sana naman....sana.

3. Sana matuloy ang printing.

4. At sa mga nagpaparinig na just for the purpose of makapagpublish kahit wala naman yatang maiaambag sa panitikan; sinasabi ko sa inyo, tiyak kong may maiaambag ang mga tula ko kahit paano. At kahit paano hindi ako napatangay sa agos ng pagmamataas.

5. Invited kaming members ng " Estropa ", fellows 2005 ng LIRA sa Sept 3 sa Trade Center for poetry reading.

6 Sa mga tumutulong sa akin sa chapbook at sa mga nagdarasal na sana matuloy, salamat talaga.

7. Sa mga nagpapahina ng loob ko, sige lang itry n'yo pa, pag natuloy di ko kayo bibigyan ng kopya bwehehehehehe Kahit naman siguro di ako established writer, may nagkakagusto sa mga likha ko, sa ayaw nyo man o hindi!

8. Naka 7 Korean movies ako noong Sabado at nag-enjoy ako sa mga stories na hindi gasgas ang mga plot. Yung mga movies naman ng Thailangd maganda rin kasi mga hitsurang Pinoy ang characters.

Mortwaryo
Ni Francisco A. Monteseña


Nakahiga sa di piniling silid;
nagmamasid, sinasaid ang lamig,

ang halumigmig ng paligid.
Dinadama kung may himala;

ang misteryo ng pagkabuhay,
inaantay. Di alam kung ibibigay.

Idadantay kaya sa noon
ay kulay-mokang balat? Salat

ngayon sa pusyaw; di na makagalaw.
Dito’y pansamantalang inilagak, isinadlak

ang di na muling babangong pagsulak
ng mithi. Sidhi ng damdaming hindi

na kaylanman maihuhugpong sa luha
ninyong lahat na nagmamahal sa akin.

Mamaya sa aking lamay ako ay babangon
na ang layon: Ibigay ang huling habiling

maiukit sa aking lapida
ang pangalan kong “ Makata”.



***Mortwaryo, Morge

Limitado lang ang bilang ng ilalabas kong chapbook dahil na rin sa financial hindrance. Maaring di kaabang-abang subalit natutuwa akong malamang maraming naghihintay. Sa mga nais magkaroon ng kopya , magpalista na at baka kayo maubusan pag ilalabas ko na ito around Oct o Nov.

May ISBN na ito mula sa Nat'l Library at scouting na lang for a cheaper printing job. Di ko pa mapresyuhan kasi ala pang costing.

1. Hay! sa wakas, tinanggap na ng nilapitan kong mag-edit ng mga tula ko ang ilalabas kong chapbook. Akala ko mahirap siyang kausap at suplado, di pala ako magdadalawang salita. At syempre proud ako. Ewan ko lang kung may matitira pa sa mga tula ko bwehehehehhe.

2. Tapos sabi ng boss ko, i-sponsor daw niya yung book ko, meaning tutulungan ako sa gastos

3. Ang daming nangyayari sa akin ngayon na sumusubok sa lakas ng isip ko. Alam ko kasing meron akong psychic ability at habang nagkakaedad ako lalong lumalakas. Kahapon lang, sinabi ng ate ko na tumatawag daw ako sa cellphone nya eh, naka off ang cell ko at tulog pa ako ng mga oras na sabihin niyang number ko ang nag-aappear na tumatawag sa kanya. Yung sa " Game ka na ba" portion, nahulaan ko kung sinong mananalo at maglalaro sa jackpot round, kung anong category ang pipiliin at ilan sa mga isasagot niya at makukuha niya ang showcase, aba aba aba at yun nga ang nangyari.

Abangan, malapit na po, limited edition at marami na ang nagpapareserve . . .

1. nag-attend ako sa palihan ng LIRA fellows 2006 sa PINTO art gallery noong Saturday at nag-enjoy ako. ang daming promising na tema ng tula. Palagay ko maraming makalulusot ngayong taon na ito dahil ang daming masipag.

2. May trangkaso ako noong Sunday kaya di ako nakapasok sa UP, sayang at crit session pa naman.

3. May bisita ako sa bahay, ang peborit kong pamangkin kaya nanood na lang kami ng DVD maghapon, Superman, Garfield, Little Man, at isang Korean horror movie.

4. Dumating ang isa ko pang pamangkin abroad kaya may tsokolate ako sa bahay

5. Iniabot ko na kay Sir Bob ang unang collection ko ng poems (around 160) yun at ewan ko kung may matira. SAbi lang niya ay huwag ko siyang mamadaliin doon. Siyempre naman, maghihintay ako para sa isang Bobby Anonuevo

6. nagsubmit na ako ng entries sa CCP ani, Likhaan, Ateneo Workshop. may makalusot kaya, just crossing my fingers.

Andap


Kukurap-kurap, pahintu-hinto ang liwanag;
patay-sindi, bugsu-bugso ang ningas.
Aantok-antok ang sinag ng estrelyang
di batid kung dadapo sa kaniyang balikat.

Sa pagkainip ay kaniyang hinubad ang lahat:
ang sumbrerong ilang taong humalik
sa kaniyang buhok at anit. Di pa man gulanit,
may pangako siyang di na muling sa ulo’y ididikit;
ang unipormeng ilang beses sumaksi
sa digmaan ng prinsipyo’t katwiran,
na di kaylanman nagusot ng tukso sa adhikang
magsilbi sa sarili, sa Diyos, sa Bayan.

Inilatag niya ito sa higaan at tinitigan.
Nagtataka sa ilang tulisang nakapag-angkin
ng kinang. Mayayabang ang kanilang balikat
sa pagdapo ng mga bituing di nagawang makapamili
ng lulugaran. O sadyang maging ang mga tala
ay nabulag ng sariling kinang kaya’t di nakilala
kung sino ang tunay na may dangal.

Nang kaniyang titiklupin ang lahat,
nakurong kaylanman ay di ito naputikan.
Walang batik na iniwan sa dangal
ang di pagdapo ng mga bituin;
walang kinang na bumulag sa pangalan
ang di dumating na hinihintay.
Higit na dakila ang pagsisilbi
kaysa sa estrelyang inaasam.
May karangalan sa pagtitiklop
ng mga gamit na di nagasgasan
ng alinlangan.

Orbe
ni Francisco Montesena 7/28/06

"Planet Mars will be brightest in the night sky starting August. It
will look as large as the full moon to the naked eye. This will
culminate on Aug. 27 at 12 am when Mars is nearest to planet Earth.
The time that Mars will be seen again this close is in year 2287. No
one alive today will ever see it again."

Forwarded text message

Naglakbay ang aking hiling;
sa kalawakan nabuo ang katuparan,

sumagitsit, tagos sa langit, umukit
ang sambit sa gilid ng mga planeta;

Nahagip ang isa. Bumagsak
sa nakalahad na palad ang bigat.

Ganito ang pakiramdam
ng isang pinagbigyan ang hiling:

parang nilalagnat, hintakot,
nagtatanong kung ano ang kasunod

ngayong nasunod ang di akalaing hiling.
Ang sabi`y mangarap na ng imposible.

Dahil batid namang di mangyayari'y
di masakit sa puso ang pagkabigo.

Ngayong nabuo ang pintuho,
bakit mayroon pa ring siphayo?

Minsan, nakatatakot ang tumingala
at mangharana sa mga planeta.

Maaaring sila'y mahalina, tuluyang
bumagsak at di na muling pumaitaas.

Kung ibigay nila ang nais, maaaring
di makatiis at humiling muli ng labis.

Kung ang pagsasa-anyo ng pangarap
ay pagtatapos ng lahat, sana'y makadilat

na panaginip pa rin ang lahat; Magising muli
sa umagang nakatuntong pa rin sa daigdig

ang pag-asa at magkasya sa simpleng ligaya;
Hindi na hihiling ng mas mataas pa.

***Orbe = mundo, daigdig