tabulas.com

1. Pamamahay
Ni Francisco Arias Monteseña 6/8/06


Kilalanin mo ang bawat aninong
pumapasok sa pintong ito.

Nakauungos sa iyo at di mo maabutan.
Silang mga nauuna pang mamahinga

sa iyong likmuan. Silang nauuna pang sumilip
sa di mo malirip na bahagi ng iyong tahanan.

Ikaw na nahuhuli’y kumilatis
sa ayaw pakilalang mga panauhin.

Paano susupilin ang kanilang
masibang panginginain? Ang lahat sa iyo’y

inaaring kanila. Ni ang iyong pagkurap
ay di mabawi sa kanilang umaapuhap, bigla.

Pahihintulutan mo bang sagarin nila ang lahat?
May mga nagbabadya pang darating.

Iinom, muling manginginain at hindi na
tuluyang aalis, hanggang ikaw ay di makatiis.

Ipinid mo na ang pintuan. Ang nasa loob ay ipagtabuyan
Ipakilalang ikaw ang nagmamay-ari ng lahat

nang kanilang kinikilusan. Ikaw ang dapat
na maunang dumating. Walang iba, ikaw lamang.


2. Uk-ok
Francisco Monteseña 6/2/06



Nasanay nang
sa sulok
magmukmok;
Ang aking mga tula’y
nahahapo,
inaantok.

Ang di pagpansi’y
udyok,
katok.

May dapat bihisang
lungkot,
takot.


Bubuksan ko na ang dibdib
nang sa sulok di magmukmok,
mahapo’t maantok.

Ang udyok at katok sa sarili:
Nawa’y mapalis
ang lungkot at takot.

Nang ang mga tula ko’y di lamunin ng

gabok,
usok.



***Uk-ok = Uka

SIGNS YOU ARE IN OFFICE HELL

Ang lobby guard niyo ay si Palito alias Rambuto.

Ang time administrator niyo ay si Cherie Gil at ang
morning greeting niya with a smile ay..."Welcome to
hell..."

Ang HR head niyo ay si Bella Flores at ang Employee
Relations Officer ay si Odette Khan at ang HR Staffing
head ay si Dexter Doria...At pag pumasok ka na walang
ID o hindi naka-uniform...kakaladkarin ka nila sa
buhok palabas ng opisina pagkatapos kang
pagsasampalin.
Ang Employee Benefits head ay si Lolit
Solis...cge...magreklamo ka na maliit ang sueldo
mo...cgeeeeeeeeeeeeeeeeee...I dare you!!!!

Tuwing may problema ang kompanya, ang Corporate
Communications head niyo na si Cristy Fermin ang
nagbibigay ng official company statement...at ang
simula nang kanyang presscon ay..."Galing ito sa isang
reliable source at itataya ko ang buhay at karangalan
ko dito...wala akong libel case na inuurungan..."

Ang official company driver niyo ay si Vandolph. Do I
have to explain?

Kapag kasama mo mag-OT si German Moreno...walang
tulugan!

Ang Legal Investigator niyo ay si Tony Falcon at ang
assistant niya ay si Wengweng...paminsan minsan ay
tumutulong si Ricky Lo at Madam Auring bilang
consultant.

Tuwing bubuksan mo ang filing cabinet andun si Mahal
sa loob para iabot ang file na hinahanap mo.

Nung huling company anniversary ay sumayaw ka ng
nakadamit babae at sumayaw sa tugtog na "ang ganda
ko...feel na feel ang long hair ko..." kinabukasan
dumating si Robin Padilla para itanong sa yo kung
niloloko mo ang kapatid niya...

Messenger niyo si Kuya Cesar.

Si Boy Abunda ang career counselor mo at tuwing me
problema ka ang tanong niya ay..."Mag-usap tayo
kaibigan...kung nasa harap ka ng salamin ano ang
sasabihin mo sa iyong sarili?"

Si Love Añover ang voice behind your automated phone
system. "Mga katsokaran...ip you chuva da number
eklavu...dependots 1...ips not...luz
valdez...charing!"

Ang Office Security niyo ay binubuo ng Tulfo
Brothers...bigla silang darating sa opisina mo at
sasabihin "Hephephep...nag-uuwi ka ng bond
paper...tarantadong to ah...manggagantsong butete
ka!!!" At pag tumanggi ka...ipapanood nila sa yo ang
hidden camera shots na nagpupuslit ka ng 2 pirasong
bond paper mula sa printer...habang pinoposasan ka ng
mga pulis.

Nung Halloween party niyo ang costume mo ay
Lizardo...at dun mo rin first time na-meet ang anak ng
may-ari na ang pangalan ay Tristan...alias Panday.
Next halloween me tribute sa buhay mo na ipapalabas.

Tuwing pasko ang prize committee head ay si Bernadette
Sembrano at Vicky Morales. Taon taon din ay nanalo ko
ng bananacue at pedicab showcase. At nangangarap ka na
sana next time si Willie naman para me jeepney.

Si Michael Fajatin ang laging nagpe-present ng annual
report niyo..."Mga Igan...nung umabot sa PhP50M ang
ating kinita...kumita tayo ng PhP50M...matapos nating
magtrabaho ng matindi kumita tayo ng PhP50M pero bago
yan ay nagtrabaho muna tayo saka tayo kumita ng
PhP50M."

Boss mo si Big Brother...at alam niya na lampas 15
minutes ka nag-coffee break kaya kailangan mo mag-type
nang gamit ang ilong mo hanggang patawarin ka niya.

Kaopisina mo si Arnold Clavio at pag naka-leave
siya...OIC niya si Arn-Arn.

At ang number 1 sign na you're in OFFICE
HELL...department head mo si Mike Enriquez...AT HINDI
NIYA KAYO TATANTANAN!!!!

Nagsimula na ang LIRA workshop sa pamamagitan ng orientation noong Sunday. May mga pamilyar na mukha akong nakilala. Sana marami ang tumagal gaya ng pagtagal namin noong isang taon.

Napanood ko ang " The Omen" at mas maganda nga ang version na ito kesa sa original. At magaling nga ang mga support lalo na ang nanny at yung pari at yung bata mukha talagang demonyo kahit ang amo ng mukha, kaakiba kung ngumiti. Panoorin nyo na.

Ang Krimen
Ni Francisco Monteseña



Kaniyang utos: utasin
hugutin sa langit, ni langitngit;

Walang dapat itira, tira-tira
mang bakas ng iwi niyang

pagkakasala, sala-salabat.
Pagkatapos ng sarap, nilasap

mo nama’y hirap, pahirap
sa budhi kong di makatanggi.

Bawat hugot, gutgot
sa konsensiyang katumbas

lamang ng salapi, panagpi
sa nabayarang dungis, hapis

sa aking nagligpit, sumungkit
ng pinagkalatang libog, lubog

man sa sala’y mahigpit pa rin
ang kapit sa talim, lalim

ng konsensiya’y naglaho, mabaho.
Siya, ikaw, ako…mamamatay-tao.

First
Ni Francisco Montesena, 6/19/06



Bakit may mga taong naniniwala
sa first love, first sight, first kiss
at kung anu-ano pang first?
Wala naman sigurong masama
kung ang minahal mo at nagmahal sa iyo
ay pangalawa o pang-sampu. Silang mga nagdaan
at naglaan ng pag-ibig sa isang payak na tulad mo.
Isa na rin namang malaking kayamanan
kung manalo ka ng second o third prize sa lotto di ba?
O pasahan ng iyong mayamang pinsan
ng pinagsawaan niya ngunit signature na lonta.
Ganyan din naman sa pag-ibig. Hindi mo na susuriin
kung ikaw ang una o naka-una
basta nakajackpot ka kung sagutin ka niya.
Eh! usong-uso nga ngayon ang ukay-ukay;
Pagpapatunay na , second hand man, o third o fourth hand,
may mapipili ka pa ring mapapakinabangan mo
sa mahabang panahon. At kung sawa ka na,
hindi ka manghihinayang na itapon.
Kung sinusuwerte nga, kahit sa ukay,
may mapipili ka pang brand new at may tag price.
Madalas, hindi ka na rin mag-iisip kung maydala bang sakit,
kesehodang may meningo pa ang ukay-ukay mong napili.
Pareho rin yan sa pag-ibig,
kahit saan pang pusali ang napili mong kasamahin,
may espasyo pa rin sa pagbabago.
Aba! pareko, marami yata akong kilalang sinuwerte
sa pag-aasawa kahit pa sa beerhouse lang nila nakilala.
Ang iba ay nagulat nang sa una nilang pagsiping,
sila pa rin pala ang nakauna.
Yan ang totoong jackpot.

According to Dr. Phil's Psycho test, these are my traits. Ang amazingly, its true.



Others see you as sensible, cautious, careful practical.
They see you as clever, gifted, or talented, but modest. Not a person who
makes friends too quickly or easily, but someone
who's extremely loyal to friends you do make and who expect the same
loyalty in return. Those who really get to know you realize it takes a lot
to shake your trust In your friends, but equally that it takes you a long
time to get over if that trust is ever broken.

Nanaginip ako ng isa sa pinkamagandang panaginip sa buong buhay ko. Nagkita daw kami ng elementary days crush ko na si Flor. Medyo may katabaan na siya ngunit ang ganda at amo ng mukha ay nandoon pa rin. Biyuda na siya at may naiwang anak. At bigla nag flash nilalaro ko ang kaniyang anak, at wiling-wili sa akin ang bata, magiliwin talaga ako sa bata. Bigla nagtapat ako ng pag-ibig kay Flor at bigla ring isa kaming buong pamilya...instant. At ang gaan-gaan ng loob ko nang magising ako. Kaya ko palang magpamilya, at kaya ko palang muling magmahal, at talagang naghahangad akong magkapamilya, magkaanak.

Hanggang sa panaginip na lamang yata talaga ang aking paghahangad, ang pagnanasa ng isang duwag...mananatiling pangarap.

Glaukoma
Ni Francisco A. Monteseña



Hindi kita makita sinta,
O sadyang hinahadlangan

ang tingin; panginorin
ng pagtatapos. Upos

na alaalang dagling pinanlabo
ng kawalang tiwala. Wala

nang darating na tanaw; bahaw
na damdaming nanlamig; halumigmig

ng mga titig na di maisilid
sa iyong mata; pangamba

na maglahong tuluyan
ang mga tinginan.

Kung abutin ng malas,
saka marahil kita mamamalas.

Marahil sa dilim,
mukha mo’y wala ng kulimlim.

H"
Ni Francisco Monteseña 6/23/06

Wala sa hinagap
na ang iyong hagahas,
hagarang hinga,
at mga hagawhaw
ay mga hagkis
na hinahagkan
ang aking pandinig.

Hagdan-hagdang hagibas
na humahagibis sa akin.
Bawat hagip sa puso'y sakit;
bawat hagok moy hagod
at ako'y walang magawa.

Di na mahagilap
ang iyong hagikhik;
ang nahahaguhap
ay iyong hagulhol.
Lumisan na
ang iyong hagutok
Hagurin ka man,
harangan ang himutok,
wala nang paglalagyan
ang iyong halakhak

Halhal akong lumisan
at nang magbalik
ay wala nang mahalughog
na halinghing mula sa iyo.

May iba nang halimaw
na humahalimhim
sa iyong halimuyak.

hagahas – hinga ng taong may asma
hagawhaw – bulong, anas
hagkis – parinig
hagibas – hambalos, palo
haguhap – apuhap, paghanap
hagutok – malutong na tawa
halhal – gunggong
halimhim - paglilimlim

Ang saya ko, natanggap ang entry ko sa tulang dadaanin:



Dear Kiko,


Nais ipaalam sa iyo ng mga editor ng antolohiyang DADAANIN na tanggap ang iyong kuwento...dahil dito, maaari ka bang magpadala ng maikling bio sa email na vishnu_venus@yahooc.om. Baka lumabas ang libro sa Agosto...salamat...


john torralba

Iluminado
Ni Francis Monteseña, 6/27/06



Nagsasalikop sa rurok
nitong pook na walang kirot

ang liwanag sa kapwa liwanag;
Hindi lamang aninag,

Hindi lamang kislap.
Dito ay lantay ang pag-iral

ng pangaral, walang parangal
na sumisilaw sa nakakikita.

Dito, tagusan ang pagkilala
sa nararapat tumanggap. Maagap

na iluluhog sa pedestal na
ang kinang ay di bumubulag.

Hindi laan ang pook iluminado
para lamang sa mga elitista’t ilustrado.

Sa Banco Nacional
Ni Francis Monteseña, 6/27/06



Nakita ko kayong pumasok sa Banco Nacional,
magkahawak kamay at puno ng buhay. Balak ninyong
paigtingin ang samahan sa pagbubukas ng joint account,
pag-iipunan ang inaasam na marangyang kasalan.
Kasunod ninyong pumasok ang mamang naka-amerikana;
may hawak na maleta, tila puno ng pera. May ngiti
ang gwardiyang bumati ng magandang tanghali. Di na kayo
pinagkaabalahang kapkapan; pati na ang kasunod,
mukha namang kagalang-galang. Sa loob, abala ang lahat.
May batang kalong ng inang naghihintay sa kaniyang asawa;
may matandang nakatungkod na inaalalayan ng kaniyang apo;
may ilang crew ng fastfood chain na nagpapapalit ng barya.
Bigla sumigaw ang mama, sabay bukas sa maleta
at ipinakita ang granada. Nilinga ang mga kasamahang
matagal na palang nasa loob ng Banco Nacional. Lahat ay natigagal.
Lahat kayo’y pinadapa. Kaniyang kamay ay iyong kinapa .
Di mo na binitiwan at siya’y tinitigan. Di mo kayang isugal
ang ilang taong pinaghirapan para lamang sa taong gahaman.
Nang malingat ang mama, inagaw mo ang maletang may Granada.
Bigla, sumabog ng di sadya; may narinig na putok, sunud-sunod.
Kasunod ang pamamaybay ng katahimikan sa kabuuan
ng Banco Nacional. Nakasabog sa lapag ang di mabilang
na baryang gumulong mula sa nakahandusay na fastfood crew.
Nagkalat ang maraming salaping papel mula sa drawer
ng nahintakutang mga teller. Nakakubabaw ang katawan
ng apo sa nakabulagta ring matanda, katabi ng tungkod.
Biglang bumunghalit ng iyak ang batang nawala
sa pagkakakalong ng bangkay na niyang ina.
At ikaw, hinanap mo siya. Nawala sa iyong pagkakatangan.
Doon mo siya nakita sa tabi ng ina ng batang nagpapalahaw.
Hanggang sumabay ka na sa pagbunghalit ng paslit.

Talaarawan
Ni Francisco Monteseña 6/29/06


Ang iyong talaarawan ay hitik sa titik;
mga kumakagat na salitang masakit,
malalim pa sa kagat ng hantik
Di ko batid kung iyong naiwan
sa ilalim ng papag o sadyang iniwan
bago ka pumanaw. Isang pagkakakilanlan;
sagot sa malaon kong tanong kung bakit
iba ang ihip ng aking paghinga
sa hanging nilalasap ni Dikong, Ate at Kuya.
Sa labing-isa mong bunga
ay may isang galing sa ibang puno.
Di mo tinukoy kung saang binhi nagmula
ang di mo rin tinukoy na bunga.
Agad akong nanalamin dala ang larawan ni Ama.
Sinipat ang kaniyang larawan sa aking repleksiyon.
Ang kilay kong manipis sa kilay niyang makapal;
Ang kulay kong madilim sa kulay niyang marangal.
Ang aking mata, ilong, bibig, labi, buhok,
kamay, paa . . .hindi kami iisa.

Saka ko namalayang ang larawan ni Ama’y
nabitiwan ko’t tinangay ng hanging
pumagaspas sa bukas na bintana,
hindi ko na kayang habulin.
Ang mga letra sa talaarawan
mo Ina ay biglang inanay,
ibigin ko mang punitin ay di ko na
mapira-piraso ang katotohanan.