Entries for October, 2005

October 4th, 2005

Movies


kikomontesena

Ang gaganda ng aral na nakuha ko sa mga movies na napanood ko:

1. Casshern : An asian movie, Japanese, na tungkol sa isang guardian spirit, na pumuprotekta sa mga taong nangangailangan. Pero ang mas malalim ay ang epekto ng digmaan, ang lagim na dulot ng pansariling dahilan - ang maghanap ng sikreto sa ikahahaba ng buhay; ang halaga ng pamilya at minamahal; ang sumbat ng budhi. An galing ng special effects ala matrix  --- DVD

2. Little Black Book - dito naman ang halaga ng pagtitiwala at pagpapanumbalik ng tiwala sa sarili. na bagamat nabibigo, ang lahat ay may oras lalo na ang tagumpay, basta maging matiyaga lamang; ang halaga ng pakikipagkaibigan

3. Game Nemesis - magandang twist ng movie tungkol sa inaakalang riddle and game na humantong sa murder. Ang aral ay di mo alam na ang kaaway ay nasa tabi lamang, in the most unexpected palces and people around.

 

Posted by kikomontesena at 12:19 PM | Add a Comment

October 7th, 2005

Mula sa Dugo


kikomontesena
Mula sa Dugo
Francis Montesena


Dugo ang idinidilig sa lupa.

Nagbabakasakaling
tutubuan ng kapayapaan,
mamumulaklak ng pag-asa,
sisibol ang hitik na bunga
sa bayang pinagsasawaang halayin
ng dayukdok na digmaan.
Ang dugong iwiniwisik
ay buhay na puhunan sa labanang
matatapos lamang kapag pagod na
sa pagmamalaki at kapalaluan.
Umaasa ang lupang dugo ang titighaw
sa uhaw na bayang ginugutom ng hirap.

Ngunit matagal pa ang pamumulaklak;
Hindi pa magbubunga ang lupa sa pagdidilig;
Marami pang buhay at dugong dadanak
na handang ibigay ng marami
upang sa pag-usbong ng pag-asa,
hindi man sila ang magtamasa
ay papanaw na maligaya
sa paghahandog ng sarili
sa nag-iisang bayan.

Kapayapaan ay tutubo mula sa dugo
ng mga bayaning malilimutan ng kasaysayan
ngunit hindi kaylanman ng bayan.
Posted by kikomontesena at 03:01 PM | Add a Comment

October 11th, 2005

Ang Tula sa Digma


kikomontesena

Ang Tula sa Digma
Francisco Montesena

 Kung may digma
ang bulong ng tula:
“ Sumulat ka at pumanig
kung sino ang tama.”

Sino ba ang tama
sa panahon ng digma?
Wasak na pangarap
iiwan ng pamumuksa.

Kung tula ang ibabala
sa kanyon at baril,
walang dugong aagos
at buhay na makikitil.

Susulat ako ng marami
at ito ang gagamitin.
Di man makapapatay,
susugat ng damdamin.

Kung payapa na ang lahat
Isisigaw ng tula,
“ sa mga titik ko
nagwakas ang digma.”
Posted by kikomontesena at 04:14 PM | Add a Comment

October 13th, 2005

Pananahimik


kikomontesena
Pananahimik
Ni Francis Montesena



Ang sabi mo’y ang tahimik ko ngayon.

O sadyang hindi mo napansing maraming
sinasabi ang aking mga titig. Hindi mo na

nadarama ang libong salitang kimkim na isinisigaw
ng aking mga sulyap. Hindi mo na pansin

ang dagundong na tibok ng puso kong humihiyaw;
Sana ay makita mong napakarami nating

dapat pag-usapan. Ibinabagsak na lamang ng aking mata
na parang mga luha ang nais kong sabihin sa iyo.

Doo’y bakasakaling mabasa mo ang nakabalot na titik
ng pangungulila sa dating ikaw; na binulag nang paghahanap

ng rangya na di ko maibigay. Kaya marahil ay naninibago
ka sa akin. Hinahanap mo ang aking katabilan

na aking itinago sa aking mga tula. Ngunit sadyang
hindi mo mahanap at makapa ang aking katauhan.

Siguro’y pareho lamang tayong naghahanap,
Nililikha kita sa aking mga tula sa kadahilanang

sa mga titik lamang nito nabubuo ang dati mong anyo.
Sa mga saknong hinahaplos ang iyong buhok.

Sa mga ritmo sinasalat ang iyong kabuuan.
Ang pagtula ko’y pag-angkin sa iyo ng buong-buo

Pagsasabi ng gabundok na damdamin, pagsusumigaw
ng saloobin, pagsasalita ng pag-ibig na hindi mo na marinig.

Ngayon mo sabihing napakatahimik ko.



Posted by kikomontesena at 11:13 AM | 1 comments

October 20th, 2005

Libreng Palabas


kikomontesena

Libreng Palabas

Ni Francisco Montesena

 

 

Mula sa

malalansang tubo

ng bumbero

ay kulay dugo ang

ibinubugang tubig;

Bumubulwak

sa kadenang bisig;

Itinataboy

sa lansangan

ang nag-iingay

na bibig.

 

 

Sumisingaw

sa pagsigaw…

mga tinig

na bahaw,

 

 

habang sa bangketa

ay nanonood

ang mga paslit.

 

 

Di malaman

kung sino

ang bida at kontrabida

sa libreng panoorin.

 
Posted by kikomontesena at 09:09 AM | 1 comments

October 28th, 2005

Ang Cellphone at ang Bible


kikomontesena

Ang Cellphone at ang Bible

Ang cellphone laging hawak ipinapakita, Ang Bible laging nakatago at ayaw ipakita. Ang cellphone binibili kahit libo-libong halaga, Ang Bible ayaw bilhin, kahit isang daan ang halaga. Ang cellphone laging pinapalitan ng case, Ang Bible hindi man lang mabilhan ng case. Ang cellphone ay ayaw magasgasan, Ang Bible hinahayaang maalikabukan. Ang cellphone bihirang makaligtaan kung saan iniwan, Ang Bible madaling makaligtaan kung saan naiwan. Ang cellphone mahirap ipahiram, baka masira, Ang Bible madaling ipahiram, kahit mawala. Ang cellphone laging binabasa kung may bagong message, Ang Bible hindi binabasa kaya hindi makita ang message. Ang cellphone message masarap i-share. Ang Bible verse nakakalimutang i-share. Ang cellphone pinapakita ang lifestyle ng tao, Ang Bible nagpapabago ng lifestyle ng tao. Ang cellphone mabilis maluma, Ang Bible hindi naluluma. Ang cellphone message kung minsan ay late, Ang Bible laging on time ang message. Ang cellphone kailangan magload para mag-message, Ang Bible laging fully loaded ang message. Ang cellphone ay mahalagang gamit ng tao, pero ang Bible ay mas mahalaga kung gagamitin ng tao. Ang iba nga sa atin, di lang isa ang cellphone......... Ang ganda di ba? San ka pa? I-forward mo kaya o itago nlang? It?s up to you?..

Posted by kikomontesena at 01:53 PM | Add a Comment
« 2005/09 | 2005/11 »