Diona part 2
Posted by kikomontesena at 01:54 PM on October 19, 2010.
Hitik
Nang mamunga ang santol,
Agad nilang pinukol,
Kahit bubot nasapol.
Tatag
Ang taga sa panahon
Ikulong ma’t ikahon,
Tatag pa rin ang muhon
Pangaral
Salita’y mas madikit
Sa puso’y umuukit
Kung magulang nagbanggit.
Hapdi
Sa sarili ang latay
Ng mabigat na kamay
Kung sa anak dadantay.
Simpatiya
Sa mababa ang loob,
Ang grasyang niloloob,
Handang ipagkaloob.
Pagbabalik
Ang ibon sa paglipad
Bumabalik sa pugad
‘Pag pagod na’t nasagad.
Bigay-Pala
Kapag ika’y matiyaga
Ano kayang biyaya
Ang higit sa nilaga?
Alaga
Ang asong pulos tahol,
Kahit di nauulol,
Sa amo’y panay habol.
Yabang
Ang dumura sa langit
Ay sa mukha ang pagkit
Ng laway na malagkit.
Hambog
Kung matayog ang lipad
At taas lang ang hangad,
Sa lupa din ang sadsad.
Lambing
At sa pamamaluktot
Pag maikli ang kumot,
Yakap ang inuungot.
Bungang-tulog
Sadyang nakaiinip
Kung sa pananaginip,
Hindi ka nasisilip.
-------------------------
Sariwang Balita
Ngayon ay bukambibig,
Sadyang nakabibikig,
Ayaw ko nang makinig.
Gubat Ang Pag-ibig
Masukal man at liblib,
Dito sa aking dibdib,
Sana ika’y mabulid.
-------------------------------
Ulan
Sa sama ng panahon,
Maliit man ang tulong,
Mabuti nang may payong.
Tagsibol
Kapag maraming hantik,
Kahit puno ng lintik,
Bunga sa sanga’y hitik.
Biyahe
Sa haba ng prusisyon,
Una pa ang kariton,
Sa kanyang destinasyon.
Orasyon
Posted by kikomontesena at 10:37 PM on October 6, 2010.
Orasyon
Sa tulos na kandila at tulo ng luhang naipon
sa ibabaw ng lumang tokador,
Sa harap ng naaalikabukang mga santo,
sa halimuyak ng mga natuyong talulot ng alay na bulaklak,
sa dampi ng hanging di makapangusap,
sa halimuyak ng bagong sunog na alay,
nandito siya, nangungusap
sa ngalan ng mga estatwang walang damdamin,
sa ngalan ng anagag ng sindi ng kandila,
sa ngalan ng kaunting init ng munting silab,
sa ngalan ng nauupos na katawan,
at natititik sa sulok ng kwarto ang larawan ng pighati,
Mayroon na itong taguri, mula sa labi ng mga nakatunghay-
Ang kisame, ang dingding, ang sahig,
Ang itim na kurtina, ang nakapatong na larawan,
At lumutang ang katawagan,
kasabay ng dupikal sa alas-sais.
Kasabay ng musikang siya lang ang nakakarinig,
Kasabay sa pagpikit,
sa pag-usal ng di mawaring panalangin,
Kasabay sa pagihip sa kandila,
Kasabay sa pagakyat ng mga butiki
Mula sa paghalik sa lupa,
Isang di matapus-tapos na ritwal ng paghihintay.
10/05/2010
Tagabulag
Posted by kikomontesena at 10:13 AM on September 17, 2010.
Tagabulag
Ni Francisco Arias Monteseña 9/17/10
Dumarating ang panahon
na nais nating magtago.
Dahil ayaw natin
na pukawin tayo ng ingay,
habulin ng bangungot
o mapangalanan ng katawagang
hindi maaaring malunok.
Kung maaari lamang mabura
pati bakas at hindi na maulinigan
ang tawag ng tinig sa utak
(sa madulas at madalas niyang pangungusap).
Paano kung sa pagbubukas
mula sa pagkakapikit
ay may tahimik na aninag?
Tatanggapin kaya natin ito
nang hindi napipilitan?
At dahil malapad at malawak
ang kamay natin sa pagyakap
ng pangako ng katiwasayan,
naniningala tayo at naghahanap
sa mga kubli ng tanaw
na hindi nakabubulag.
Hanggang may mahukay tayo
sa mga pagitan at patlang,
may masalok sa hangin,
may matanaw na bukas,
may mabuksang talukap,
may madinig na ingit,
may mabuksang pinid.
Dahil laging may naiiwang susi
sa anumang ikinakandado,
kahit sa pintuan ng ating mga sarili
o sa bintana ng ating mga kaluluwa.
diona
Posted by kikomontesena at 03:11 PM on September 3, 2010.
Paglipas
Pag-ibig kung kumupas,
Dalahi’y sakdal bigat,
Buhatin sa balikat.
Pananalig
Lumambong man ang dilim,
Sa dasal na taimtim,
Hirap kayang tawirin.
Tiis
Magdildil man ng asin,
Dal’wang subo mang kanin,
Ulam pa ri’y dalangin.
Panahon
Sa mga dahong dagdag
At araw na lagalag,
Pag-asa’y nagmamatyag.
Sipag
Gayahin mo ang langgam,
Sa araw mang malamlam,
Walang gutom na ramdam.
Busilak
Ang puso kapag bukal
Ng pag-ibig at dasal,
Nagiilaw ang dangal.
Imbi
Ang lunod sa delusyon
Na s’ya ang Panginoon,
Apoy ang destinasyon.
Kimi
Kung damdami’y di hayag,
Anuman ang ihatag,
Bugtong pa rin ang lahat.
Baybay
Kabataang jejemon,
Titik ay nilalamon,
Wika ay nalalason.
UBOD NEW AUTHORS SERIES II BOOK LAUNCH
Posted by kikomontesena at 10:14 AM on July 28, 2010.
UBOD NEW AUTHORS SERIES II BOOK LAUNCH
From the Ateneo Institute of Literary Arts and Practices and the National Committee on Literary Arts of the National Commission for Culture and the Arts, the launching of the chapbooks published under the UBOD New Authors Series II will be held on August 12, 2010, 5:30 PM at Escaler Hall, Science Education Complex Building A, Ateneo de Manila University, Quezon City.
A continuation of the first UBOD New Authors Series launched in 2005, the UBOD New Authors Series aims to introduce authors writing in the different Philipine languages who haven't yet published a book.
The following titles are to be launched: Dagiti Babassit nga Alipugpog by Sherma Espino Benosa (Short Story, Iloko), Paglalayag Habang Naggagala ang Hilaga at Iba Pang Kuwento by Christoffer Mitch C. Cerda (Short Story, Tagalog), Pasakalye by Mar Anthony Simon Dela Cruz (Short Story, Tagalog), May Mga Dumadaang Anghel sa Parang by Marlon Hacla (Poetry, Tagalog), Oda sa Tadik asin iba pang Bersong Bikol ni Jerome M. Hipolito (Poetry, Bikol), Ha Salog ug iba pa nga mga Siday by Leonilo D. Lopido (Poetry, Waray), Duha Ka Tingog by Jay Gallera Malaga (Poetry, Hiligaynon), Ayaw Pagpudla an Tuog Ug Iba pa nga mga Siday by Phil Harold L. Mercurio (Poetry, Waray), Pagluluno at Iba Pang Tula by Francisco Arias Monteseña (Poetry, Tagalog), Ang Mga Anak Sang Montogawe by J.V.D. Perez (Short Story, Hiligaynon), Ini an Sakuyang Hawak Asin Iba Pang Bersong Bikol by Adrian V. Remodo (Poetry, Bikol), Siso Sakradang Ug Iba pa nga mga Siday Han Tagoangkan by Janis Claire B. Salvacion (Poetry, Waray), Pinagbiahe by Aida Campos Tiama (Poetry, Iloko), Tanang Namilit sa Hangin by Noel P. Tuazon (Poetry, Cebuano).
